Tónlistarsjóður
Hlutverk Tónlistarsjóðs er að efla íslenska tónlist samkvæmt Tónlistarlögum og reglum um Tónlistarsjóð.
Sjóðurinn skal stuðla að kynningu á íslensku tónlistarfólki og tónsköpun þeirra hér á landi sem erlendis. Tónlistarsjóður heyrir undir menningar-, nýsköpunar- og háskólaráðuneytið og er í umsýslu Tónlistarmiðstöðvar.
Allar fyrirspurnir varðandi tónlistarsjóð →
Umsóknarfrestir fyrir alla styrki Tónlistarsjóðs, nema ferðastyrki, eru í apríl og nóvember.
Lokað er fyrir umsóknir í augnablikinu.
Ferðastyrkir eru veittir annan hvern
mánuð frá og með 1. júní 2024.
Umsóknarfrestir eru fyrir miðnætti aðfaranótt
1. febrúar, 1. apríl, 1. júní, 1. ágúst, 1. október, 1. nóvember (auka úthlutun) og 1. desember.
Styrkir
Tónlistarstyrkir
Veittir úr
deild frumsköpunar og útgáfu
Styrkur til að semja tónlist, taka hana upp, gefa út og kynna.
Styrkir til hvers kyns frumsköpunar á tónlist, útgáfu og tengdrar markaðssetningar. Hljóðritun, útgáfa, tónsmíðar og lagasmíðar heyra hér undir. Markmið styrkjanna er að stuðla að fagmennsku, nýliðun og fjölbreytni í tónlist og þar með efla tónlistarlíf hér á landi.
Upphæð verkefnastyrkja:
500.000 kr. - 3.000.000 kr.
Flytjendastyrkir
Veittir úr
deild lifandi flutnings
Styrkur til tónleikahalds og tónleikaferða innanlands.
Styrkir til tónleikahalds innanlands og tengdrar markaðssetningar. Styrkirnir eru veittir beint til tónlistarfólks eða umbjóðenda þess. Markmið stykjanna er að stuðla að nýliðun og fjölbreytni í tónlist og þar með efla tónlistarlíf hér á landi.
Upphæð verkefnastyrkja:
250.000 kr. - 3.000.000 kr.
Upphæð langtímasamninga:
1.000.000 kr. - 6.000.000 kr. á ári.
Viðskiptastyrkir
Veittir úr
deild þróunar og innviða
Styrkur vegna tónlistarverkefna, svo sem tónlistarhátíða, tónleikastaða, viðskiptahugmynda í tónlist og sprotaverkefna.
Styrkir eru veittir til verkefna sem teljast mikilvæg fyrir þróun og uppbyggingu íslensks tónlistarlífs. Markmið styrkjanna er að byggja upp starfsumhverfi tónlistarfólks, efla tónlistariðnað á Íslandi og styrkja nýliðun og fjölbreytni í tónlist. Áhersla er lögð á fyrirtæki sem þjónusta og vinna með tónlistarfólki. Sérstaklega er litið til þess að öll áætlanagerð sé vönduð.
Upphæð verkefnastyrkja:
500.000 kr. - 3.000.000 kr.
Upphæð langtímasamninga:
1.000.000 kr. - 6.000.000 kr. á ári.
Ferðastyrkir
Veittir úr
deild útflutnings
Styrkur vegna ferðalaga til að sækja sér tækifæri erlendis.
Styrkir til tónlistarfólks og fagaðila sem vilja sækja sér tækifæri á stærri markaði, t.d. með tónleikaferðalögum, þátttöku í sendinefndum, sölusýningum og fagtónlistarhátíðum (e. showcase). Einnig eru veittir styrkir til tónskálda vegna frumflutnings á tónverkum. Styrkir eru veittir til verkefna sem eru tilbúin til útflutnings (e. export ready**). Fagaðilar, s.s. umboðsfólk, geta sótt um styrk vegna starfstengdra ferða milli landshluta, t.d. til að sækja ráðstefnur og tengslamyndunarviðburði. Athugið að þetta er tilraunaverkefni til loka árs 2024.
Upphæð styrkja:
50.000 kr. innanlands
75.000 kr. innan Evrópu
100.000 kr. utan Evrópu
Markaðsstyrkir
Veittir úr
deild útflutnings
Styrkur til að vekja athygli erlendis.
Veittir eru styrkir til verkefna sem stuðla að því að koma íslenskri tónlist á erlenda markaði og auka möguleika á velgengni utan Íslands. Styrkir eru veittir til verkefna sem eru tilbúin til útflutnings (e. export ready– sjá neðar) og er sérstaklega litið til þess að fjárhags- og markaðsáætlanir séu vandaðar. Einnig er horft til þess að umsækjandi sé í samstarfi við sannfærandi aðila erlendis.
Upphæð verkefnastyrkja:
500.000 kr. - 2.000.000 kr.
Mælikvarðar
Úthlutunarnefndir meta umsóknir út frá markmiðum og áherslum hverrar deildar og nýta staðlað matsblað út frá eftirfarandi þáttum:
40% Verkefnið
Úthlutunarnefnd metur hvort verkefnið sé vel skilgreint, áhugavert, hvort það stuðli að fjölbreytni, sé faglega unnið og af metnaði.
20% Umsækjandi og aðrir þátttakendur
Úthlutunarnefnd metur hve sannfærandi er að umsækjandi og þátttakendur nái settum markmiðum með tilliti til faglegs og listræns bakgrunns þeirra.
40% Fjárhagsáætlun, kynningar- og markaðsáætlun og verk- og tímaáætlun
Úthlutunarnefnd metur hvort fjárhagsáætlun sé raunsæ og sýni fram á fjárþörf verkefnisins með skýrum hætti.
Úthlutunarnefnd metur hvort kynningar- og markaðsáætlun sé raunhæf og vel rökstudd, m.a. með tilliti til markhópa, markaðssvæða og fjármagns. Einnig þarf að vera skýrt hver ber ábyrgð á markaðs- og kynningarmálum.
Úthlutunarnefnd metur hvort verk- og tímaáætlun sé raunsæ, skýr og í samræmi við aðrar áætlanir.
Umsóknir verða ekki teknar til greina ef lokaskýrslur, eða áfangaskýrslur hafa ekki borist í umsóknarkerfið fyrir verkefni sem fengu styrk árið 2022 eða síðar. Það á við umsóknir úr „gamla“ Tónlistarsjóði og Hljóðritasjóði, en ekki Útflutningssjóði.
Langtímasamningar
í boði fyrir umsóknir um flytjendastyrki og viðskiptastyrki
Aðilar sem sækja um flytjendastyrki og viðskiptastyrki geta sótt um langtímasamninga til tveggja eða þriggja ára.
Athugið að þótt sótt sé um langtímasamning miðast fjárhagsáætlun í umsóknarformi einungis við fyrsta árið. Ítarlegri fjárhagsáætlun fyrir allt tímabilið skal skilað sem viðhengi.
Verk- og tímaáætlun í umsóknarformi ætti hinsvegar að endurspegla tímalengd verkefnis sem sótt er um fyrir. Til að mynda ef sótt er um langtímasamning til tveggja ára þá ætti að fylla út verk- og tímaáætlun fyrir tveggja ára tímabil.
Ef úthlutunarnefnd ákveður að veita ekki langtímasamning er umsóknin tekin til greina fyrir stakan verkefnastyrk og ber úthlutunarnefnd þá að skýra fyrir umsækjanda hvað verið er að styrkja.
Athugið að ef sótt er um langtímastyrk er litið til eftirfarandi þátta eins og við á:
- Er verkefnið mikilvægt fyrir íslenskt tónlistarlíf?
- Styður verkefnið við þróun og uppbyggingu íslenska tónlistargeirans?
- Er faglega unnið að verkefninu og eru uppgjör og skýrslur fyrri verkefna sannfærandi?
- Hafa fyrri styrkir verið vel nýttir?
- Er verkefnið með sjálfbærnistefnu, t.d. varðandi jafnrétti, inngildingu og umhverfismál?
Tilbúin til útflutnings (e. Export ready)
fyrir umsækjendur í deild útflutnings
Við mat á umsóknum í deild útflutnings er litið til eftirfarandi þátta.
Nafn og ímynd til staðar
Mikilvægt er að verkefnið (hljómsveit, tónlistarhópur eða einstaklingur) sem sótt er um fyrir sé með vel skilgreinda ímynd og að það hafi skapað sér listrænt og faglegt orðspor í tónlist.
Aðgengilegt tónlistarsafn
Undir því nafni sem sótt er um er æskilegt að til sé útgefin tónlist á helstu streymisveitum. Ef umsækjandi hefur ekki gefið út mikið af tónlist þarf að fylgja sannfærandi útgáfuáætlun með umsókn, ef við á.
Tónleikareynsla
Þegar sótt er um ferðastyrk vegna tónleikahalds er æskilegt að sýnt sé fram á reynslu af tónlistarflutningi.
Kynningar
Mikilvægt er að vera með sannfærandi markaðsáætlun með skýr útflutningsmarkmið. Litið er til umfjöllunar í erlendum miðlum, sýnileika á samfélagsmiðlum, vefsíðu og hlustunar á streymisveitum.
Teymi og/eða faglegir samstarfsaðilar
Litið er til samstarfs við fagaðila, svo sem umboðsmanna, bókara og kynningarfulltrúa/skrifstofa. Ef samstarf við fagaðila er ekki til staðar eru gerðar strangari kröfur á að tónlistarfólkið sjálft hafi skýra sýn á hver útflutningsmarkmið þess eru og hvernig þeim verður fylgt eftir.
Allar fyrirspurnir varðandi tónlistarsjóð →
Merki Tónlistarsjóðs
Fyrri úthlutanir
-p-1600.png)
.jpeg)
.jpeg)
.png)
Spurt og svarað
Er það styrkleiki að sýna fram á aðrar tekjur eða styrki fyrir verkefnið í fjárhagsáætlun?
Það er alltaf jákvætt að sýna fram á aðrar tekjur og/eða styrki sem fást fyrir verkefnið og það dregur ekki úr virði umsóknarinnar svo lengi sem sýnt er fram á sannanlega fjárþörf verkefnis.
Fjárhagsáætlun og langtímasamningar
Þegar sótt eru um langtímasamninga miðast fjárhagsáætlun í umsóknarformi einungis við fyrsta árið. Ítarlegri fjárhagsáætlun fyrir allt tímabilið skal skilað sem viðhengi.
Styrktímabil
Að öllu jöfnu þurfa verkefni að hefjast innan 18 mánaða eftir að úthlutun fer fram, sbr. 9. gr. í reglum Tónlistarsjóðs. Ef að spurningar vakna varðandi verkefnatímabil hvetjum við umsækjendur að hafa samband við Tónlistarmiðstöð.
Skýrslur
Skýrslum (áfanga eða loka) er skilað í gegnum mínar síður Rannís. Ef við á birtist valkosturinn "skýrslur" á mínum síðum notanda sem ber ábyrgð á að skila skila skýrslum verkefnis. Hafið samband við Tónlistarmiðstöð ef skýrsla birtist ekki á mínum síðum.
Hvar er sótt um?
Sótt er um Tónlistarstyrki, Flytjendastyrki, Viðskiptastyrki og Markaðsstyrki Tónlistarsjóðs í gegnum umsóknargátt Rannís. Sótt er um Ferðastyrki á vef Tónlistarmiðstöðvar.
Umsóknarfrestur
Umsóknarfrestir fyrir Tónlistarstyrki, Flytjendastyrki, Viðskiptastyrki og Markaðsstyrki Tónlistarsjóðs eru maí og nóvember árlega og staðfestir umsóknarfrestir eru auglýstir á miðlum Tónlistarmiðstöðvar og Menningar- og viðskiptaráðuneytis. Umsóknarfrestur fyrir Ferðastyrk Tónlistarsjóðs er fyrir miðnætti aðfararnótt 1. febrúar, 1.apríl, 1.júní, 1.ágúst, 1.október og 1. desember.
Hvert er hlutverk Rannís?
Tónlistarmiðstöð notar umsóknar- og matskerfi Rannís við umsýslu Tónlistarsjóðs samkvæmt samningi milli Menningar- nýsköpunar og háskólaráðuneytisins og Rannís.
Hvert er hlutverk úthlutunarnefnda?
Úthlutunarnefndir Tónlistarsjóðs eru skipaðir af Menningar- nýsköpunar og háskólaráðuneyti. Úthlutunarnefndir eru fjórar, ein fyrir hverja deild Tónlistarsjóðs. Þrír aðilar sitja í hverri nefnd og þrír varamenn. Úthlutunarnefndir fara yfir og meta umsóknir samkvæmt Tónlistarlögum, reglum og áherslum Tónlistarsjóðs.
Hvert er hlutverk Tónlistarmiðstöðvar þegar kemur að umsýslu Tónlistarsjóðs?
Tónlistarsjóður heyrir undir Menningar- nýsköpunar og háskólaráðuneytið og er í umsýslu Tónlistarmiðstöðvar samkvæmt lögum frá maí 2023. Miðstöðin hefur umsjón með sjóðnum og er verkefnastjóri á vegum Tónlistarmiðstöðvar tengiliður við umsækjendur, Rannís, ráðuneyti og úthlutunarnefndir. Verkefnastjóri boðar úthlutunarnefndir á samráðsfundi til að fara yfir umsóknir og situr þá fundi sem hlutlaus aðili og fundarritari.
.svg)
.svg)
.svg)
