Ný stjórn var kjörin á aðalfundi Tónlistarmiðstöðvar þann 29. apríl síðastliðinn. Fulltrúar stofnaðila miðstöðvarinnar - STEFs, FÍH, FHF, TÍ og KT - sitja áfram en ráðherra menningar-, nýsköpunar- og háskólamála skipaði þau Óttarr Proppé, tónlistarmann og sérfræðing í heilbrigðisráðuneytinu, og Evu Hrund Einarsdóttur, framkvæmdastjóra Menningarfélags Akureyrar, sem fulltrúa ráðuneytisins.
‍
Óttarr tekur við sem stjórnarformaður af Einari Bárðarsyni og Eva Hrund Einarsdóttir tekur sæti Sólrúnar Sumarliðadóttur. Við þökkum Einari og Sólrúnu fyrir vel unnin störf og gott samstarf á þessum fyrstu og mikilvægu mótunarárum Tónlistarmiðstöðvar og bjóðum Óttarr og Evu Hrund velkomin til starfa. 

Heimili íslenskrar tónlistar

Á fundinum kynnti María Rut Reynisdóttir, framkvæmdastjóri Tónlistarmiðstöðvar, ársskýrslu liðins árs. Árið 2025 stimplaði Tónlistarmiðstöð sig inn sem heimili íslenskrar tónlistar. Við horfum stolt til þess árangurs og hlökkum til að byggja áfram á þeim grunni.

Starfið teygði sig víða, bæði hér heima og á alþjóðavettvangi:

• Alþjóðlegt samstarf: Við tókum þátt í 22 alþjóðlegum viðburðum í 13 löndum. Þátttakendur á okkar vegum - tónlistarfólk og fagaðilar úr greininni - voru vel á annað hundrað talsins.
• Fræðsla og tengsl: Haldnir voru yfir 30 fræðslu- og tengslamyndunarviðburðir á árinu,, auk þess sem Tónlistarmiðstöð hýsti að jafnaði einn viðburð á mánuði fyrir utanaðkomandi aðila.
• Innlendur stuðningur: Miðstöðin átti í nánu samstarfi við fimm innlendar tónlistarhátíðir sem allar gegna mikilvægu hlutverki í menningarstarfi landsins. 

Hér má nálgast ársskýrslu Tónlistarmiðstöðvar frá árinu 2025