Komdu með Tónlistarmiðstöð á Reeperbahn 2025
18.–21. september 2025 – Hamborg, Þýskaland

Tónlistarmiðstöð stefnir á Reeperbahn Festival í september og leitar að tveimur íslenskum fagaðilum í tónlistargeiranum sem vilja taka þátt í ferðinni. Þetta er kjörið tækifæri til að efla tengslanet og kynna sig og sín verkefni á einni af áhrifamestu faghátíðum í Evrópu. 

Um Reeperbahn

Reeperbahn Festival er meðal stærstu klúbba- og faghátíða í Evrópu en á ári hverju umbreytir hátíðin St. Pauli hverfinu í Hamborg í einn af mikilvægustu vettvöngum álfunnar fyrir alþjóðlegan tónlistariðnað. Hátíðin spilar ekki síst mikilvægt hlutverk fyrir ungt og upprennandi listafólk en listinn af tónlistarfólki sem brotist hefur upp á yfirborðið í kjölfar framkomu á hátíðinni er endalaus. Ráðstefnudagskrá Reeperbahn hátíðarinnar býður jafnframt upp á fjölbreytta viðburði þar sem nýliðar og reynt fagfólk fjallar um málefni og áskoranir hins alþjóðlega tónlistariðnaðar.

Hvað felst í ferðinni?

Þau sem verða fyrir valinu fá ferðastyrk, að hámarki 75.000 kr. á mann, og aðgang að hátíð og ráðstefnu, auk boðs á tengslamyndunarviðburði sem Tónlistarmiðstöð stendur að í samstarfi við norrænar miðstöðvar.

Hverjir ættu að sækja um?

Við leitum að fagaðilum sem vinna við íslenska tónlist: útgefendum, umboðsfólki, bókurum, tónlistarforleggjurum, tónleikahöldurum og þess háttar. Áhersla er lögð á að þátttakendur starfi með tónlistarfólki sem er „tilbúið til útflutnings“, sé með skýra alþjóðlega sýn og áhuga á að byggja upp tengsl á þýskum og evrópskum mörkuðum.

Umsóknarfrestur er til 21. júlí

Skráning fer fram hér>>

Frekari upplýsingar um hátíðina má finna á: https://www.reeperbahnfestival.com